要數一件武漢肺炎帶來的正面影響，就係無得暢遊異國，卻因此發掘無數不輸異國甚至「祖國」的大山大景。負面就係一發掘，無得出國的香港人就峰湧而至，今日香港人玩厭，明日就輪到大陸人至地球上所有人。
你怨小弟知道好野就應收埋唔好攞出來哂，但小弟唔講，好事多為的政府都會去推廣：今年的財政預算案說要升級十條行山徑，通街都哀哉太墩即將淪陷，相信伸手到小弟今日提及的只係視野問題。
今次要講的都係行山，負責任講句起行前還是準備隻有點抓地力的行山鞋，更嚴謹點就係你先去修讀個一級山藝課程，但讀完後你又會猶疑是否真係完全照用：如今日行的是要地圖八和十二兩份夾埋，睇埋App的會發覺做返個原始人唔容易。
老套講句有錢就輕鬆很多：叫架綠的直到西貢東壩，沒錢就只好搭架西貢開去黃石碼頭的94號巴士，在鯽魚湖站落，踏足麥理浩徑第一段十公里兩小時行程。當然你亦可以中途折取落北丫村最後東壩走，即小弟行徑的反方向。
到達東壩唔使過壩，藍色巨物標誌後有條鋪好的階梯，這個星期六很多遊人聚在此，卻沒多少人理會它，或以為係維修鈄坡用的。我毒自踏上，見再來係鋪好的山徑，相信只要再講兩句，現在只徘徊在東壩的或港女或大媽都識走上來。
早些年落破邊州還有些難度，但有點名氣後政府就「好事多為」，現在由東壩來回，你夠快的十五分鐘打埋個卡都係唔難。
幸在政府的好事只到撿豬灣，入口就呈立個危險警告牌，落灣路徑偏鈄鬆散，但就只係一條大坑碌落去都唔見得會死人。回家翻閱新聞，才知出事位置是在灣內尾段，有人綑上石柱跌落海。從來都唔明白政府做事的邏輯，為何不把牌子立在意外事發地點？
回上花山繼續沿海邊走，路沒怎麼修飾卻給走得清晰，路不愧係人走出來的。來到地圖上標示萬柱海岸位置，萬柱海岸講緊係由破邊州到撿豬灣一連串的六角形火山岩柱。你問香港為何似沒大山大水，一來香港太細，二來香港真係福地：除了只叫你諗到放假的颱風就沒有甚麼災害，而大景往往係廣闊的大地上自然間內的衝突。面前壯觀的火山岩柱群，就係億年前火山爆發，再一直而來海浪侵蝕而成，就係大自然衝擊的遺產。
但你話人定勝天，大景也可是人為：就係後面的瑪尼堆塔群，肯定唔全係自然產物，雖然石塊本來在此，但肯定由人出手一疊而疊堆放。香港人唔多信藏傳佛教，肯定只係貪好玩，但一個二個的無心插柳卻合成這樣的宏大景致，當然你亦可話唯有天意才可合成萬人力量。
這地方這些年遊人增多，似被開闢了新路就連手機地圖也未趕及更新，要靠點眼力望清楚前方究竟有沒路段，最好有一兩個途人才定好續往前方走。接著過七重石灘，七重的石塊似和撿豬灣般呈圓，但氣勢低一截，灘上還有幾個似係由白腊而來的遊人，還是趁早去白腊。
到白腊村想找間士多買支汽水食個餐蛋麵，但進村只見到一間間塗得七彩的村屋，還有一個個少男少女在打卡，卻見唔到有士多。聽最近士多只在沙灘，但沙灘似更為吵鬧。見村屋後有鋪好的石路往糧船灣村，有糧就應該有得食吧，我估。
走十分鐘後先見到間天后宮，宮左旁有個洗手間附帶個洗手盆，開著水掣卻唔見有水出。右旁有間餐廳，渴極餓極的我進去，見其冰櫃只有罐裝汽水和支裝啤酒，問有沒賣餐蛋麵之類的，老闆說他們只賣海鮮，見其餐每位計每人四百，雖說係連送我回西貢碼頭的船票，但一條友這樣未免太痴線，還是叫罐十五蚊的汽水算，但又覺得望著夕陽應叫啤酒......
相對隔離吵鬧的白腊，糧船灣到北丫可謂被遺忘之地，我想剛才拿出一百塊問一下，那老闆或好歹也會炒碟飯給我食，畢竟極有可能我是他們全日難得遇到的客人，亦有可能他們唔稀罕賺我這小錢。
講真，若果係人連小錢都稀罕，這個舊公立學校對出籃球場、那幾間村屋對出的空地早就搭滿了營地，有人總以為賺錢乜都得，但又有人告訴你唔係有錢就咩都買得。
回家翻查一下，原來撿豬灣又名為香港之心，終於知道為何入口要放個危險警告牌：早些年只知食飽就好的港豬的確溫馴談不上危險，但這兩年，這隻豬突然唔旨在只是食飽，於是變了隻勇猛的野豬，那就危險了。
沒有留言:
張貼留言