寶島行 - 小琉球

其實第二日還可選留在高雄，但總覺得未必有下一次，不如去些特別的地方。 

 

話去小琉球當去長洲，其實只對一半 - 去唔算太難搞定：高雄車站旁建國路巴士站，搭9117 / 9117A到東港光復路站。台灣巴士有時候係長途車和市內公車混合物，故站多得嚇人，即使車內有到站廣播，但座位坐得太舒服，稍一不慎隨時大睡至墾丁。 

光復路站落車，看著地圖走到碼頭十五分鐘路程。東港其實係個較完善的大鎮，七仔全家便利店就連普通超市都有。碼頭旁有一大座熟食中心，東港正是漁港，或者在此食海鮮該係唔錯主意，奈何身邊人唔太食甲殼類東西。 

飯後搭兩點起航的船，廿分鐘後到，落船在白沙尾，這除了係一應俱全的民宿集中地外，稍向東走更已到其中一地標花瓶石，但此石更神似拳頭，而這裡海浪似很兇猛，相對香港的黃竹角鬼手時被靠近摸到爛，這個拳頭更似埼玉之拳，叫你不敢褻玩。 

原本可繼續往西到美人洞，但落船時留意到碼頭旁的藍色海提，記起有人坐上海提，遠方係高雄工業區的相片。興致勃勃向返西過到去才發現海提高達四米，夠膽坐到上去都要有架無人機去拍，奈何我們手裡沒無人機呢。

 

一路向東會先到中澳沙灘，其實係石灘，重要係白色的珊瑚石，小琉球係出名的潛水地，眼見這灘都有人玩潛水，但其實唔潛就咁細看石灘上的石都夠。灘上的白石似一條石徑，若有一條白裙該會襯托出唔錯的畫面。「可惜你沒買給我。」女人窒道。

 

回上馬路，在村裡穿插，聽到大戲聲內去看看，還是未懂欣賞那種拆天吵雜。再找個機會靠近海邊，一時見到漁福漁港的海提有點像黑山的公主島，又一時會見到綠葉包圍的機槍堡，接著就係谷歌地圖上被當係景點的龍蝦洞，其實路旁有繩可爬落去，奈何我們都沒帶手套。

 

再經過閉門的小琉球海洋館，時近日落，前面卻係旭日亭 - 這是個觀日出的地方，「其實我們剛才唔係該一路向西嗎？」女伴問道。我想不如找位在附近的甚麼網美老木化解尷尬，但望遍附近卻找唔到路落海邊，一查起上來仲老尷：原來要直行前到大福漁港再綑邊繞回來。「喂，我餓了。」女伴怨道，還是乖乖由大福那邊繞到內陸再向北搵食。還真低估了小琉球，原以為今日起碼可走全島一大半結果只走了四份一。

 

第二天早上在白沙澳那邊閒逛，逛到城隍廟附近，見到有環島觀光巴士，有兩條路線，一係順時針環島一周，另一係由北向南穿插過島中心。我們想今日徒步向南都係唔實際，還是用個省力的方法。

 

這巴士像小巴同的士的混合：車上司機稱你沿路見到有車截停就可，司機會像擴音器滔滔不絕介紹島上景點，還好回程他見我倆有點累就沒怎說話。

 

我們在天南國小站下車，沿忠孝路向著燈塔走上山，有兩個景點分支：一係百年老榕樹，但這棵被圍欄圍著的榕樹卻不及旁邊遠觀到厚石群礁般可觀。另一就係白燈塔，這卻似吸引到較多遊客，一架架機車輪住過來打卡，但這燈塔周圍被鄰近樹木掩蓋，沒有那孤高之感。

落山走到厚石群礁，講真若甚麼水塘乾涸到地面龜裂而造成火星地貌，都會令你到來打卡，這裡更該叫你不能錯過。只係如月球遠睇漂亮，近著陸其實難走難有地方坐下，搞到你想快快回到馬路上走人。

 

接連蟾蜍岩、老鼠岩、觀音石，過海子口，正如昨日日落時觀旭日，今日也近中午就到落日亭，再到隔離的永安橋遺址 - 聽係比落日亭更適合影日落的地方，但現場所見又唔見得有所特別。最後到烏鬼洞門前，見入內要門票，孤寒鬼的我們，還是截剛好到來的巴士，回白沙澳食午餐再搭船離去好。

其實還真低估了小琉球，原以為唔玩潛水的我們玩兩日一夜就夠，結果最後還有一整段西邊沒走，只係被香港郊野寵壞了的我們，還唔知有否興致再來。