閩南行 - 泉州散步

 

近年泉州多了国內遊客，只係仍未到廈門鼓浪嶼迫爆程度，表面理由係一位叫白岩松的記者說了句：泉州係你一生有機會至少要去一次的城市。若你唔知這個姓白的是誰，這句聽得像以前国內景點常賣的不到乜乜乜等於沒來過物物物，多麼不實在。 

若你問我怎解釋，大概近年兩岸交惡，国人自遊行去台灣沒門，想找替代就想到泉州。就係東西街或中山中路的騎樓群，還真如台灣街境。而且比台灣更進步的是：台灣騎樓內路常係高低差，攤檔貨物堆放阻擋。相比泉州騎樓內完全平直路，踏版一野滑過都沒問題。 

  

只係泉州沒有共享單車，反而用上台北街頭那種拍卡的租借單車，這就莫名其妙大倒退：唔計要定點借還車，就係要找張卡來用車已經一大麻煩。或許要同現在坐台北市長大位的國民黨蔣萬安搞好關係，才接收這些快要被淘汰。 

 

若你為食而旅行，你或以為西街就如台灣夜市，只係台夜市會如葵廣般庶民，西街卻就係一陣東門味，總之你要相宜價錢認真飽食一頓，退去東街騎樓下的餐廳才能應付你所需。西街係給你攝牙罅，再加一杯珍珠奶茶。另不知那時有人發掘出由西街舖天后拍向東西塔的風景，這街天台頓時升價十倍，有間標入場費五十，有間可以買竹桶奶茶抵扣，但想起那竹桶該已循環再用無數次，還是再找一下間。最後到街頭，有間不收入場費沒閒管你有沒幫襯，只係 這国度人對講明免費唔使客氣，於是向西街方向欄河位擠滿打卡的潮男潮女，你唯有較定相機140mm焦距，趁有空位就更唔客氣地攝入，再向西方按下快門。另一免費天台係面向東塔的遊客中心，但這又太前，未能同時拍著東西塔連底下街景。

你問泉州有沒夜繽紛？或者已係國際都會遺址，所以只見西街燈火通明，東西塔只照亮一塔。西街其中一巷有叫小西埕之地，穿過一連串紅檔檔燈籠再一紮  紮心型許願牌，其實就係個市集，但場面有點冷清，好在叫有座位讓你見攰就o抖。

 

第二朝睡醒，吃完早餐後，目標係泉州各教寺廟。三大廟關廟清淨寺文廟集中在涂門街，但用不著直接搭車過去，還是向南穿過巷子小街或偶有發現。見釋雅山公園內有施琅故居，只係到時係有公園但古宅仍在執修。

還可再繞到文化宮附近，看一下百源清池與銅佛寺，才再繼續往南。清淨寺係所有寺中要收入場費，但也只是三塊，還真係回教的遺址：一邊係沒了屋頂的禮拜堂，另兩邊一間完全閩南風，但可見內裡的阿拉伯地毯；另一係完全新建，係用來討好阿拉伯的全新清真寺，三部都見唔到甚麼人到內做禮拜。

 

再到隔離關帝廟，在廟前拍一下香火，見香火太鼎盛費時進。調轉頭往西到文廟，還是那麼宏大而清淨，拜孔的不多，大概早些年拜孔的都被批得一乾二淨，二係霸氣關公對比下，文弱的孔子顯得無能佛用。

 

趕回酒店時，察覺承天寺這佛寺，於是退房再回來一看，佔地和文廟相差無幾，但可看的更豐富。雖然原寺已在文革中被毀，但還重建得看算係咁。

 

承天寺對面係承天巷，走到內裡穿到中山路，愈見愈多文藝氣息。記起台南係出名要行小巷發掘，泉州要扮對岸，似也要營造這氣氛。

見中山路往南有個居民區裡有市舶司遺址，中山路似想變作另一條西街，穿過因大路重鋪而變得狹窄的騎樓，穿進居民區更狹窄的小巷，左穿右插才找到。但就一座小廟，有點驚訝一座大港的管理機構竟小隱於市，唯到時要待多一小時才能進，沒閒唯有向北離去。

 

一路向北，途經沒開門的天主教堂，總之向著東塔方向走，到開元寺拜一下李叔同，到西塔看梅花，再於西塔旁的出口，搭巴士回火車站。

 

其實把泉州當成台灣，或係想如遊台南日系建築般，也把泉州各教寺廟建築走一轉。但是否要花上兩三日才行得完？走馬看花看承天寺似大不敬。或者如聽RubberBand 《不如散步》般：無路牌 隨便拐 / 誰又話過不可出界，平常心拿著相機，見好風景拍下就好。當然，再踏著單車會更好。