閩北行 - 鼓山

 

早排有個大陸旅遊廣告，講一對情侶女方不知何故失憶，男方帶她來福州想喚醒她記憶，唯這女一直發公主病bili bala，發到男人口黑面黑，叫人心諗還不如把她飛了一了百了，就到唔諗住睇落去時，就播到兩人同坐鼓山纜車看夕陽 - 平心而論這廣告似比懲教處女團成功一點。

實際去係因兩日假期，唯雨帶幾佈滿整個華南，唯似會被雨雲忽略的就係福州，其實細看福州未去的也多，鼓山只算其一。

總之就係高鐵搭到來福州，搭地鐵二號線到鼓山站，顧名思義一出站就係鼓山景區大門。

鼓山高七至八百米左右，有步道可上，當然亦有那廣告打著的纜車，來回七十單程五十，我想落山跑下來就好，於是只買單程。纜車真如那廣告咁：半露天沒冷氣更沒玻璃窗，直率說簡直一舊吊籠。

當然簡陋有樣好，就係無玻璃窗阻擋可拍盡車廂外風光，除了居高望回福州，那就係望到其實這纜車無咩人搭，還以為大熱天時該無咩人好似我咁傻仔，唯望向山下的步道卻眾多唔怕熱的遊人，且多唔係落山而係登山，似乎話那廣告係成功係太早，畢竟這国人來香港買支水的錢都唔願駛，又有幾多會咁豪爽駛五十搭纜車？

上到頂，由車站至旁邊的瞭望台遍地遊人，車站底有間小食店，價格叫相宜起碼西瓜沙冰等廢水只八塊，似乎上來的都係當地人多，小食店就知掠唔到幾多外來人就唔敢開天殺價。

山上其中一景係十八景，唯時已近五點關門貴時俾十蚊入去，沿隔離的路往前探索還有甚麼，越前就見路旁的石刻愈來愈多，鼓山的摩崖石刻達三百個，說其中一為朱熹手書，唯未能認出。

碰到鼓山路，沿隔離雙鼓步道的指示步進，見涌泉寺的車路入口，欲內進時被門閘旁守門的阿姨攔著，說要付四十塊入場，既然十塊都貴時使的我當然調頭。出返馬路見有一階梯走落，見到似係寺的另一入口，同樣有著收費亭但遠望有人無視那亭入門口，原來亭五點下班，即只要你待到阿姨她自己不想再努力的時候，你就可連四十都慳返。

進寺範圍一邊繼續摩崖石刻，一邊階梯落靈源洞，由洞前望回上方有種威勢，也算勝景。

但要把握時間睇日落，趕快看放生池到大雄寶殿，再返出門口。後來查看地圖知南邊還有一般若苑，假若四十塊入場係兩邊包哂，其實還算可接受，只係得知可趁有人不想努力混進，我也難有意欲付費。

返到去先在纜車站前買杯西瓜沙冰，再到瞭望台想著一邊嘆沙冰一邊看日落，唯剛才晴朗現在卻起大朦，日落當然看不到，只可待福州市區高樓慢慢亮燈。

像係稻荷山上趕落山，唯見迎面而上的遊人絡繹不絕，我想應係趕睇夜景，只係落山沿路尤其纜車桿位置，纜車與遠方亮燈高樓的配搭看似比瞭望台更佳燦爛精彩。

落到底出大門口臨入地鐵站時見有個主要賣福建小食的美食廣場，想找些填肚子卻竟都早關門。逆向去諗下次可先在此食飽，有點力氣就可省回五十元纜車票費，轉用在十八景或湧泉寺，纜車畢竟搭一次就好，我才不想招呼個有公主病bili bala的女人。

突然記返起今日是甚麼日子，抱歉我不該今日到這国度。