馬交行 - 煙花前後

 

每年九至十月澳門都有煙花匯演，今年第一場的星期六有假，老樣子星期五晚到珠海隨便找間按摩場瞓返晚，只係按摩場就係瞓唔得到，第二朝迷糊狀態地離店。

第一次沒太多胃口於是拱北地下商場隨便買個麵包加咖啡當早餐食完就過關，還是把肚皮留在接下來的地方，畢竟去人家地方要消費一下係基本禮貌。

關閘附近兌了澳幣再向南，距今晚放煙花還有差唔多十小時，想想還有甚麼未去過，走再到蓮峯廟附近，想起廟隔離的望廈炮台未上，那就上一下。

炮台建於一八六六年，其實和大炮台東望洋等齊名，只係景色卻比下去，被當為一個普通的公園，另設的瞭望台完全被樹遮掩，看景要直接走上炮台那邊，看到的幾限北區一帶，因高樓較多遮掩更前方，望向沙梨頭方因樓房較矮才望得較遠到珠海國際會展中心，感覺那些樓房會係近期電影《我未許願先吹蠟燭》的場景所在。

經望廈炮台斜坡落山，出美副將大馬路對面見望廈山房，山房似冼星海博物館都係綠色外牆，說內裡有市集，到唯到來時未到開門時間。

想起唔係要消費一下嗎？到雅廉訪大馬路的金利食店，十一點到來時顧客唔多且看似附近街坊，點了雜雞米，湯底自動附有咖哩，連奶茶埋單六十多。吃畢見有些「家人」遊客也到來，大概這是小紅X推過的店。

食完往東經紅街市，興之所致入去望一下內裡，但覺又係普通街市一座，還是出返去。

接到林茂海邊大馬路，這裡大概算係沙梨頭區，唯先來卻似氹仔北區 – 一排高樓大廈連讓你唔使行落地的高架天橋系統。

落橋行過海邊休憩區轉彎就接近沙梨頭沒較光鮮的一面，唯近內港邊的沙梨頭街市係近年新建，才剛食完未有肚嘗其熟食中心，一樓中心門隔離有一空地可望向內港，或者待有時間在此望日落再到中心食晚飯。

繞進沙梨頭海邊街，把騎樓塗到紅綠黃相間的沙梨頭圖書館似是這裡地標，走入去拍兩張兼想找個位休息，但覺佔著位唔睇書有點唔好意思，看到一本《寫出你的村上春樹FU》，講如何把你的文字寫到村上風，例如長長的一句《沒有色彩的多崎作和他的巡禮之年》，或加入時間《1973年的彈珠玩具》，讀了一陣子又覺得把時間用在研究村上太浪費，還是把書放回書架下次再來。

出館走至內港邊，沿爹美刁施拿地大馬路向南走至十六浦，看的就是一個沒落的港口，沒甚麼旅客，只因十六浦內的賭場摺埋後，一大叫人過來的原因已失去。至於殘留落來的碼頭，沒用卻也唔見得開放給人觀摩。

望向亞美打利庇盧大馬路見新葡京連新中央招牌，定接下來的目標係新中央酒店，沿大馬路走，偶見一些橫街如有同善堂的庇山耶街，但堂主要係診所可看的唔多，看兩眼就行。

返大馬路轉彎見原是德成按的典當業展示館，其實就係舊當舖，內裡格局唔大，但叫比剛才的同善堂可睇耐一點。

到了目標新中央，其向大馬路的門口說是蘇彪電影《騙騙喜歡你》王耀慶彈跳著氹王皓上釣的場景，但見拍完後這位置卻似一直租唔出去似，唔知是否拍過騙戲有點雞棚味。

新中央酒店的天台係向公眾開放，上到去突覺點解咁大件事無人講：只樓高十一層卻已是歷史城區內的第一高樓，故可三百六十度盡覽城區。更重要係樓下議事亭前地已被家人打爆時，家人竟沒個識上來這地。

這天台唯一限制係唔準外食樓下的蜜雪冰城拿上來喝，只這裡的吧中午卻沒人開門營業，見其兩杯雞尾索價一八一，比曼谷王權瑪哈納功大廈天台平一半，但覺得夜晚上來唔點酒也該唔會趕我走。

議事亭前地其實已行過無數次，近年似有人覺大大塊空地要用盡，於是中心常被大大件裝飾佔著，有時如棵聖誕樹還可，但如這大棵蓮花，再連擠湧的家人們，有點留不下去之感。

卻想不到下個目的去那，唯有先去附近的大堂，到大堂時家人們已相對少一點，唯大堂似有婚禮未能入內。

想痴杯水飲於是去新葡京的賭場，何生似乎較孤寒，賭場就真只有水機，既然如此就唔好蝕錢連時間俾佢，出去走上兵營斜巷。

斜巷上嘉思欄兵營有一澳門保安部隊博物館，館只一層擺出的器物多，唯唔算深入講保安部隊史，睇兩眼就走。

隔離就加思欄花園，有坐椅可歇息，唯夏天仍較多蚊多烏蠅，教人坐唔耐。

但距入夜還有起碼三小時，想不如吃過早飯，想到去下灣街市食牛尾通，沿南灣大馬路到崗頂前地，前地的劇院大修中，隔離的聖奧斯定教堂卻中門大開。

落回風順堂街向南走，到高樓街亞婆井前地才知自己走多了，過龍頭五巷會經鄭家大屋，叫順眼看一下。

記起大屋之間到過，但感覺像首次發掘，也叫耐心細看一陣。

出去後五點，到下環街市的熟食中心叫碗牛尾通併墨魚餅，盛惠六十。見有人拿著炸魚皮似的來搭枱食到卡卡聲，有點後悔我係咪該轉下口味。

大概行到累唔想走，於是走到司打口搭3A巴士，睇谷歌地圖納悶為何三公里搭巴士和行路差唔多時間，開車不久謎底解開 - 內港的甚麼交通正仆街來，是但一燈位都塞五分鐘以上。

搭到觀音像海濱休憩區，先行去近科學館那邊企足兩個鐘，因厚雲就係日落碰不著，還要落兩場細雨，但等到落去就係勝利。

放煙花前有無人機表演，剛好這晚後北京全禁無人機，似諷刺又同時表演甚麼叫一国兩制。

第一場表演國係巴西，唔知是否同葡語系又似和中国較好朋友，放時有無人機助陣。

原本諗睇一場就走，只係走到觀音像附近，覺得可以觀音像作襯托拍多一場。第二場係瑞士，聽落該比巴西有錢，但沒出無人機，且相對觀音像出的煙花似係旁客。

大概只有主教山的機位未試，故又要想下次再來拍煙花前要找那裡攝時間，覺得想不通或可再上新中央酒店天台發呆，其實想在那裡拍夜景，但夜景和煙花看來又係魚與熊掌的關係。