關東行 - 羽田機場

 

因為考完試編了三日假要找個散心地，遇著日元跌到接近谷底，於是，東京，我要進來了。 

  

你問三日會否太少，想起剛有日本對港免簽及羽田夜機時，還有人編過東京一日就夠攻略。故三日還可以玩到你夠皮，前提係一定要搭讓你收工立即直到機場就上機的夜機，起碼第一日已讓你玩足。問題係現在有羽田夜機的，就只有因管理不善而在全球最佳航空公司排名榜節節下跌的國泰航空旗下的因另收手提行李費而搞到怨聲載道的香港快運。你窒小弟說漏去東京夜機香港航空也有，但那是去成田的，其實試過一次，就知羽田比成田為好。 

羽田係自己到過各大機場中最易捱夜：就算你真係收工就趕到機場上八點起飛的班機，仲要孤鳩寒唔買快運上的飛機餐，凌晨一兩點出關要找東西填肚的你，唔係只有幫櫬羅森，四樓還有間通宵營業的摩斯漢堡店，除了漢堡還有鬆餅，組合起來就變成「讓學生們羡慕並顫抖的成人奢華生活」套餐，起碼比在羅森買飯團更能滿足到你這個成年人。 

  

回想起登機時前面有個穿著白色校服少女，心諗放學即去日本還真係太型，若果她在我面前吃起那套餐，我或忍不住拍了下來，屆時那個嚷會叫學生羡慕的才該給震撼到，或者震撼到係因為我就如那X主般老了：在我們還不知羞恥自以為高高在上時，原來高度竟和一個學生妹並排。 

一如其他機場，羽田到處都係周圍躺的特種兵，我想他們大概都沒相機，或者焦距都唔到一百四十以上，否則這裡其中一渡過方式，就係拍深宵仍在營運的機場櫃檯，欣賞下辛勤的地勤或空姐…… 

 

你要正經點那就走上五樓，羽田的展望檯很是遼闊，第三航廈的更是面向東，臨近夏天東京的破曉時份也會早到四點幾，影完紅色的天空到日出，也就五點多，往市區的頭班列車也該開。 

 

但我不著急，搭穿梭巴士到第一航廈，那邊的展望台係面向西，也就係可以拍向第三航廈連富士山，一座機場連飛機總比以羅森便利店作底還壯觀。只係去到才知那邊展望台開放時間為六半。 

要找地方呆上一小時，搵到日航辦公室對出的座椅，為相機手機插上USB充電，頭挨著椅背地坐，看著上班的日航地勤，上班進辦公室前都會背門口地鞠躬，也就像向我鞠躬，一個窮遊撚扮上大爺的簡單方式。 

 

第一航廈像是間舊式商場，六點已有些店舖如舊書店有開，看到間高級壽司店，諗起大堂有些賣便當的，只係早吃了那個奢華生活套餐後，肚子未能叫我對那些便當打起主意，或者該留起肚皮，望著富士山吃便當早餐才寫意。 

 

六點半一出去，看到第三航廈，卻因為厚雲遮蓋而看唔到背後的富士山，看來破曉和富士山真係魚與熊掌。 

 

看來下次來東京仍會想羽田著陸，只係想起它近期有著兩單撞機意外，還是留了把冷汗。