關西行 - 摩耶山上

 

搵上摩耶山的資料，大多都教你在三宮搵18號巴士，巴士站又講到很隱秘。但自從偉大的谷歌地圖面世，你就知道世事總是條條大路通羅馬：先搵“摩耶電纜”再按路線選個最佳就可，例如可搭2號再纜車站附近行一段路。反之落山後，也可由纜車站看著地圖直奔落去，到阪急王子公園站等搭電車返三宮。 

 

摩耶山纜車在秋冬時限星期五六日才有最遲夜晚九點尾班，要看那日本三大夜景只好趕在這星期日下午四點搭巴士，落車跟著地圖的提議路線走幾分鐘過去。究竟那個站點落車唔太記得，只記得落車時地段該等高線已抬升一百，隨便搵一條斜路可居高臨下直望到海；另一係車駛到一學校區附近會有群小學生妹搭上，我想今日星期日也要返學嗎，想問那群學生，但自己唔懂日文，又似會被當怪叔叔。

纜車分兩部分，由地面站至虹之駅為路軌纜車，虹之駅至星之駅為吊車。地面售票處讓你選只買至虹之駅或全程，究竟能否單買虹之駅至星之駅那段還真是個待考究的好問題。對只為睇夜景的你會納悶唔係買全程來回就可嗎？轉頭你一上去就明。

 

原預計摩耶山唔止山頂上的夜景，站與站之間該有些可看，果然虹之駅係唔止有些：除了站旁荒廢了的觀景台，還有一大條直通至星之駅的歷史步道，難怪會分兩段計價。只係一來似唔夠時間行山，二來就係買了全段來回，算死草的自己不甘要白蝕一段，看來要記低：下次山下買定兩個飯團上來散步。

 

吊車上到星之駅，站上一樓係間咖啡店，找個窗邊高檯位置就坐，店有正經飯餐，但這四點半係下午茶時侯，還是選芝士蛋糕搭奶油咖啡的Cake set，八百日元，起碼窗外的風景，簡直任何間咖啡室都無法比擬的頂點享受。

懶洋洋呆到五點半左右，一出來就後悔，忘記暖烘烘的咖啡店和夜幕垂下開始冷溫的山頂係兩世界，還要我只穿短袖沒帶外套。但夜景豈可不影，硬著頭皮在人群內放好腳架，拍得幾張唔走樣的就拿冧離去：除了抵受不了寒冷，就是山距離神戶似太大，景像雖遼寬但建築就是細微，唔似香港山頂盧吉道前IFC或ICC等高樓明顯一棟棟，難怪要數世界三大夜景香港才入圍，雖然香港山頂搵間七十元有蛋糕咖啡的咖啡店簡直天方夜譚。