關西行 - 嵐山以北

 

京都係難以走完，就係嵐山你都唔會一日內行得哂，除非你把心一橫住在那邊一晚，否則你又不甘花兩日在此。  

   

我這次也只放半天，反正我也不想迫那長年人滿的小火車，就大清早繞嵐山北部，再上嵐山公園，最後頂多渡月橋趁墟一下。到京都站搭JR到嵯峨嵐山站，向北方出口出，相對人滿為患的南邊，住宅為主的北部確係清幽，係散步好去處，只係食店唔多致認真搵食艱難。  

  

向北會先途經清涼寺，目測其景色一般，沒有多兩棵紅葉不在話下。特別在其是《源氏物語》主角光源氏之原型源融所營建。唔得閒讀《源》，最省時可看日劇《真好啊光源氏》 - 伊藤沙莉大罵千葉雄大扮的光源氏：「你所愛的女人，沒有一個係幸福的！」我大概想到是甚麼故事，當然還是起碼睇過電影版《源》，再到宇治源氏物語博物館後，先再來買票考究餘下。  

轉往西北方向，會走到化野念佛寺。這裡樹葉部分轉紅，景像比清涼寺燦爛。寺其實係一大墓園，張婉婷《宋家皇朝》在此取過一景：張曼玉飾的宋慶玲來找祭祠亡友趙文瑄飾的孫中山，電影拍張從竹林走落到幕園，但實地行過就知竹林上方係另一墓地亦是掘頭路，就咁睇呢套赫然變左靈異片。 

  

半開玩笑言這裡還真係「鬼」才到之地，最多到來的是洋鬼子，不要說大陸人就係日本人都少，顯得最活潑的愛宕念佛寺似係洋遊客的至愛，景色就在林林總總面目皆不相同的石佛。張大春遊記《嵯峨野，自己的愛宕念佛寺》裡覺得石雕師傅所刻畫的既不純是佛亦不純是人，或係在人與佛之間變幻擺盪的「孤魂野鬼」。你話他亦自嘲：「擺盪在東西方美學幻影之間的藝術工作者 - 不論是國際知名的小說家或布匹批發商  - 都祇是無可依歸的孤魂野鬼而已。」卻似無端把群體立地的佛講成鬼未免太過。但你也想正如他會於上千佛像中尋找自己臉孔，前提你要有時間，就算要付入場費，都很難作個理由讓你放棄嵐山餘下景物去逐個石像尋覓至入黑。 

  

行完兩寺就轉向一直往南，過二尊院小倉池等，嵯峨野觀光鐵路嵐山站外有幾檔小攤檔，但頂多如肉飽等讓你攝牙罅唔叫得你食飽。穿過那因唔收錢而比化野念佛寺擠擁十倍的竹林，就到嵐山公園龜山地區。 龜山的看點在於展望台，即使其海拔不高，但仍居高臨下於嵐峡，係唔用迫小火車而觀賞紅葉之優選，縱使紅葉還未紅得顯著。

 

最後向南落山，經過角倉了以銅像、周柏豪恩來詩碑，落到峡岸邊，拍下河裡的小船，有撐船女生面向我鏡頭笑住擺V手勢，這麼好禮貌我當然要按下快門回敬。抵達渡月橋時肚子餓得很，還是找間食店祭祠五臟廟還實際，因轉頭還要趕去另一座山。提起山，我總想下次再到龜山野餐，儘管都是便利店裡的飯團也好。