波羅的 - 半日赫爾辛基

你實話我矛盾，小女孩也如此罵：你就話波蘭係大國，所以兩天華沙才好意思。那芬蘭不夠大？赫爾辛基你竟好意思擺半日？ 

  

我堅持，因為雖為大都會，實際情況正如華沙：華沙只走老城區一日也可搞掂。赫爾辛基的景點都集中在港口區附近，更要命是若你在星期日下午才到達，這時港口旁的集市休業，教堂都於下午五點關門，怎樣都在門外走過，用得你多少時間？ 

  

講到星期日，就係唔止集市休息，大商場都於晚上八點關門。明明和平時期竟玩起宵禁，不如話北歐人才會日入而息。當然預備好金錢來血拼的小女孩，更抱怨明明離上機還有大把時間都有錢沒門駛。 

  

聽住，係小女孩自己有錢，我自己則係窮撚一件，窮到係見到美術館收十七歐元入場要望門興歎，唯有討論沒錢也不浪費這半日的行程。既然要欣賞芬蘭的美學，就近係火車站旁的頌歌圖書館 (Oodi)。 

  

頌歌貌係巨無霸，實際放書只有第三層，藏書量目測只如香港是但一間分區圖書館。內裡有咖啡店、有可拿來玩的卡片遊戲、有家長帶小朋友來玩但又不算嘈吵、有情侶依偎在一角，說是圖書館，還不如說是一個社區中心。 

  

頌歌一建成就成為赫爾辛基的新地標，只用了八億。你說香港高鐵站旁唔係有個戲曲中心嗎，但那個除了門口俾你坐一坐，入內就係起碼數百元的門票，重點係那外型別說你不覺得丟人現眼。 

  

覺得把半日都用在頌歌也未免太浪費，還是外出向南走到商業區再往東，穿過Esplanadi公園就到港口片區 – 赫爾辛基的古跡都盡在這裡：由最東的烏斯佩斯基大教堂 （Uspenskin katedraali），再繞到海邊的集市廣場，再往北上階梯到參議院廣場加主教座堂（Helsingin tuomiokirkko）。全部沒看到內裡都沒所謂，反正外在已夠應酬身旁小女孩，就像嘗到黯然銷魂飯後的驚呼：「點解芬蘭咁靚架？救命呀，係咪痴線架……」 

赫爾辛基真係只適宜留半日，若有一整天，恐怕你唔係用在圖書館，就係用光在海旁的座椅上。此時有一杯咖啡就好了，那怕是車站便利店的兩歐元咖啡也好。 

我想再來可以進取一點，例如到Nokia的總部走一趟。