南洋行 - 難擺多過三日新加坡

 

對窮撚的我來講，我係對新加坡有偏見，覺得就係來路過，至多擺三日就得的地方。

當然貧窮限制我的想像，你有錢的話，擺四五日來逛所有博物館藝術館動物園再到聖淘沙到落賭場玩兩手或都好夠。現實係我的確沒錢，每晚四百元青旅床位已令我牙痛咁聲，誇張講句若不是有熟食中心和芽籠或小印度的超市，係很難在這裡過活兩天以上。

但平心而論，若只在這城市不怎花錢散步拍拍照，還是唔錯的。起碼我那間索我四百只給床位甚麼都要自理還不給寄存行李的旅舍，還會給我醒來時由洗手間走廊望出去如此景觀。

 

哈芝巷 (Haji Lane) 的確夠琳琅滿目，多種顏色塗上兩層高的平房，間間賣水晶吊飾藝術品的小店咖啡店等，打咭係無可置疑一流。只係這裡消費似都係一等價錢：口渴到7仔買支綠茶，沒記錯都收我兩新幣。

 

搭地鐵到牛車水 (Chinatown) ，往北找到熟食中心醫肚後，走過芳林公園，公園內有一演說角落 (Speaker Corner)：說是人民行動黨一黨獨大時，給反對派用來發表政見之地。或者新加坡早就很美麗，這地除了家庭在拋球嬉戲和小童攬球隊練習外，睇唔到有人在發表偉論。而我們的美麗新香港，亦早就無左那個鬧洪洪的城市論壇。

 

繼續一路向北，經過愛琴橋 (Elgin Bridge)，右轉經過新加坡國會、藝術之家 (The Arts House) 等，到河邊見萊佛士像 (Statue of Sir Stamford Raffles)。萊佛士正如香港的砵甸乍，係開創新加坡之士。縱使道德潔癖者指他還把賭博妓寨等引進來，但就算佢唔搞，只要佢純搞出這個大港口，這些都會自然引進來。就係新加坡現在都有賭場，還有算是東南亞唯一合法的紅燈區。

 

新加坡國家美術館 (National Gallery Singapore) 算是個徒步中可稍息的地方，有些展館係免費，當我上五樓想由上至下看一番時，五樓的職員走來問我買了票未 - 非新加坡人要付十新幣才能睇哂全棟，雖唔算貴，但我覺得沒太多時間在此留連，就係見免票可進的快走多兩走算。

經過Victoria Concert Hall、Dalhousie Obelisk、安德遜橋 (Anderson Bridge) 就到新加坡地標魚尾獅 (Merlion)，正值星期日，這裡如香港的維園，變成一個小菲律賓。話雖唔算大擠迫，但眾多賓賓的談話聲，對比剛才寂靜的美術館周圍，仿似兩個世界。

 

 

過橋到大榴槤似的濱海藝術中心 (Esplanade - Theatres on the Bay) 附近的地鐵站，搭地鐵到巴耶利峇 (Paya Lebar) ，聽說星加坡唯一的紅燈區在芽籠 (Geylang)，但成條街見都係足浴店，招牌又唔係大腳版上哈哈笑。最多就係一間門外一排Mary，門口寫著Make Love no war，但這個Love究竟係同真人還是同舊膠去產生？或許係我唔想到頭來要駛錢上舊膠，還是唔內進考究。

 

回到Haji Lane旅舍稍息，再搭地鐵到克拉碼頭 (Clarke Quay)，再沿新加坡河行到魚尾獅看夜景，河明顯比馬六甲遼闊，係宏大都會氣派但顯得疏離，馬六甲係狹小小城但密集。你問我喜歡那個，我說還是喜歡馬六甲，就係行到又累又渴時到河邊cafe坐下該不用太多錢。新加坡則係路過那波霸餐廳，想進但望望自己荷包還都係唔好意思。

 

第二天早上十一時才離開旅舍，往東到勞明達熟食中心，即首天到來食早餐的地方再食多次午餐。想著到機場前逛多一個地方，開地圖見轉向北走係小印度區，但這個叫小卻該係行過南洋城市中最大的一個，亦係除芽籠外所見新加坡較市井之地，其色彩偶如哈芝巷般繽紛，卻沒有花唔起錢的壓力。

最後我到機場，趁上機前見識一下Jewel的室內噴泉。

新加坡這地你係要落地體會才大悟你對其未免太先入為主：你以為它清潔到如潔癖，但當你清晨到熟食中心或放工時間輪侯地鐵站的公廁，你才知道它也可以這樣污漕；你埋怨它房價比馬來西亞高上好幾倍，但好歹它也任由你在Jewel呆一個通頂；它看似高冷但你以它當背景庸俗地打卡它也奈你唔何。

 

但你問我會否下次多放幾日在此，我看難了，就係它的高房價令我不能負擔多幾日。我的確窮撚沒錯，那唯有用最有限的金錢看最多的景色。故此再到南洋，我或寧可或留連吉隆坡，或檳城。

 

或等我發了達吧，但有錢後我反而有更多地方等著我去探訪呢。