廓爾喀 – 沙塵街道加德滿都

加德滿都徒步，其實唔算好受。

加都係尼泊爾的第一大城，除了王宮或政府機關附近的主幹道較為闊寬平整，其餘泰米爾區 (Thamel) 或阿山廣場 (Asan Chowk) 都係街道狹窄，卻人多電單車左穿右插。最大鑊的係內街道路都沒鋪柏油，故天氣炎熱就電單車一過就塵土起飛揚，鼻敏感的人必定難受。

泰米爾區係遊客也是手信的集中地，要買甚麼都可在這裡最後解決。唔嫌煩或可再走到阿山廣場，如果泰米爾比喻為女人街，阿山廣場才是鴨寮街，各種店鋪、小販、還有寺廟在正中，彷似深水埗站對出的大電路版。各種各樣夾雜在一起，真正南亞市井的雜亂風情。

由泰米爾或阿山廣場往南走就係杜巴廣場 (Durbar Square) ，杜巴中譯就係宮廷。沙阿王朝未統一天下時，加德滿都、帕坦、巴克塔普爾分成加德滿都盆地三國，都各有一杜巴廣場。講真，加都係三個中顯得最平平無奇的一個，建築唔夠巴克塔普爾的宏大、外型雕刻也唔夠帕坦的精緻。

而三個杜巴廣場都有三相同，大批白鴿聚集、當地人也聚在閒坐，或百無聊賴或談心、都係對外國人收一千盧比入場費，拿著票七日內任你過。

如果覺得加都鬧市煩到受不了，大可以付三百盧比搭架的士，到山上猴廟 (Swayambhunath) 暫避一下。但若果你覺得猴子係很麻煩的動物，那你都係別來好了：如同緬甸，信佛的尼泊爾人還是不好殺生，故對動物很為放縱。猴廟很多猴子似都沒做絕育，除大猴還有小猴，或爬佛像或搶你汽水罐。

猴廟也是加都的最高點，看著加都的天際線，都係低矮的平房，一面無際似的，像叫你所有煩惱也就此攤開放空。