緬甸行 - 人文茵萊湖

又係天氣的錯，總覺得來茵萊湖 (Inlay Lake)唔係看風景的。

來到娘水鎮 (Nyaung Shwe)，陰天兼時而毛毛雨，總覺得不是看湖的好時機。但沒法，時間不多，娘水鎮本身除了鎮就只是鎮，除了間文化博物館外，就唔似再有甚麼好看。

若來旅行是吃喝放鬆，娘水鎮其實也能滿足到你：茵萊湖大概在歐美旅客間有些名氣，西餐廳馬殺雞都有好幾間，馬殺雞價位不知道，只知吃過最貴的即製火烤pizza連可樂係九千緬幣，大概係香港一餐大膠樂晚餐的價錢。

反正都給了那萬二五入場費，唯有再給萬八包隻船，一隻船其實可以坐四人，可惜這天就只有我孤毒一個。

船夫是個寡言的人，也或許他唔識英文，咁樣也好，聽少很多廢話，隨遇而安待他帶我到那裡。

船經水道駛出娘水，到達湖面，陰天厚雲令湖顯得沒啥看頭。若果今天係藍天白雲，或許我對茵萊湖景觀的評價會公允一點。

故此看到主要都係水上植物，和大澳漁村一樣的棚屋。

其實覺得旅程重中之重，係叫你見識類似日本的工場見學。

第一站係叫Ngwe Sin Tun的手飾工場。一個女孩出來招呼，講解如何用礦石打造手飾，歷時約十分鐘，最後重頭戲是她們的手飾鋪，但只是看看而已，不買女孩都沒有所謂咁款。諗深一層大概係我係仔，係女的話那女孩似會落足嘴頭。

離開前一個大媽靠埋來賣花，我答：「留返拜山先賣俾我啦。」大媽一臉疑惑，「Wait at see the mountain!」大媽終自動彈開。

下一個景點則係五日市集，一迎面而來係賣手飾雕像小擺設的攤檔，整個旅程最有機會破費就在這裡，因為很多頂盡只係十蚊，仲可殺價。

走到內裡則只係個街市，看看人家賣甚麼農產品，喝杯奶茶吃件點心，再繼續。

第三站則係個紡織工廠，個人感覺這個最有趣。

這次招呼的女孩講得很詳盡，講足半個鐘。先講傳統緬甸衣服，是先由湖中找某種植物 （好似係蓮蓬），逐根逐根拉絲出來，斬足這成大桶，還不知有沒十條線。

「咁織咁樣樣一塊布要幾耐？」

「一個月。」

雖然背後我想究竟係女孩講得唔清唔楚還是在誇大，只係要提供茵萊湖周邊居民的衣著，拿整個茵萊湖來種蓮蓬都未必夠。原本諗趁機買件龍基，但都係講唔出口，因為唔想見到這個笑得尚算甜美的女孩最後俾出個「屌你老母你混吉架」的臉色送我走。

第四站係造船廠，這個女孩又係講只有十分鐘。得知造一艘船一星期，比製一件衣服仲快。用剩的木頭可造些工藝品，幫襯一下，這回這個女孩給出一個露齒的笑容。唉，這個國家服務水平何時才會追到如老麥呢？

造船廠後還有間小煙廠，製煙的女孩曾招呼我坐下看，但我看兩眼就走。緬甸的煙大概係世界上最健康的煙，因為感覺不到有任何尼古丁成份。

第五站係座不記得名字的大寺，最特別係它嚇人到嘔的廁所。

第六站係雨遮廠，大概我一身窮撚打扮，D人寧願招呼鬼佬都費事招呼我，這樣也好，我靜靜看過夠。

第七站係Shwe Inn Dain Pagoda，守門口的看見拿著相機的我，問我拿了五百拍照費。

Shwe Inn Dain Pagoda仿似日本京都伏見稻荷大社，長長彎彎的白色迴廊，唔係一排攤檔大殺風景，相信又係個精緻的打卡熱點。

最後一站係香港人都知的Nga Phe Chaung Monastery，即跳貓寺是也。為何知道港人都知，因為一進去，就聽到一群操廣東話的在逗貓玩。

跳貓寺大概只係個傳說，現在看到內裡的貓都懶洋洋周圍躺，而且貓的數目並不是想像中那麼多，我們的大澳也該比它有更多。

其實緬甸一街都係貓貓狗狗，為著玩貓而到跳貓寺可謂沒甚麼意思的。

早上七點半到四點的旅程，算係大滿足。

若果有藍天，當然更好。