其實可以兩日都參加一日遊鴨仔團,但就係唔鐘意做鴨仔。見曼谷與北碧間坐小巴車程兩小時,卻又要夾好泰緬鐵路上每日只限對開三班列車。左搜右索見到逢星期六日都會開班由華南薘站開出至南多瀑布的來回列車,但資料已係疫情前。上泰國鐵路部售票網
(https://www.dticket.railway.co.th/DTicketPublicWeb/home/Home)一看:拉到Exploring
Thailand by Train裡有打著Sai Yok Noi,按進見有240Bhat冷氣車及120Bhat三等車,三等車才可拉開車窗拍窗外,但想到離開曼谷到內陸的炎熱唔係講玩、又見車到死亡鐵路段時只會途徑而沒閒讓你踏足路軌、列車開出時間朝早六點半,五點就要起身似有點自虐……最終120Bhat讓我克服一切,網上信用卡付了錢拿到車票pdf檔,再訂好火車站對面兩晚酒店。
原以為開放免簽後,這班車實被特種兵們佔據,實情係只見到一個女遊客在用微信,車廂八成都係泰人。看來小紅書沒大推此車,似乎對普通尤其為打卡的旅客而言,坐冷氣大巴兼逛茱莉之城再看長頸鹿的一日遊係更佳選擇。縱使列車清早開往內陸時係涼風迎送,但下午返程就迎面熱風,你想去廁所洗個面但見馬桶似係直排,洗手盆出水偏弱,你會想又唔係真當特種兵,兼又唔係要去成大事,那一點苦都受不了又如何。
七點五十分,列車停靠第一個景點佛統府(Nakhon Pathom),停四十分鐘,名義目標景點係車站前五分鐘路程,一百三十米高的全球最大佛塔。而拍耶攀(Phya Phan)起佛統塔唔係為炫耀,而係如《伊底帕斯王》般弒了親父,得知「I
am your father」後痛悔而建來懺悔。只係現在到來遊人都如像逛寶蓮寺般沒個會了解此悲劇,塔前牌子寫著外國人要付60 Bhat,原覺得遙望一下便可返轉頭費時付入場費,只係不知覺走進閘裡、再上階梯、到佛像前也沒人走過來著我付錢。
為何大塔只係名義?因為覺得實際景點係五分鐘路程上一列列排檔,四十分鐘實係讓你買早餐。更甚者寶蓮寺對出賣魚蛋燒賣也不張揚,這裡卻係豬肉香腸串燒檔大模斯樣地燒著賣,若你覺得佛門前地大口吃肉太罪孽,那只買水果竹筒飯之類好。想起汪曾祺《受戒》講個專出和尚的村莊,和尚們打牌在大殿上殺豬食肉,或者大家也無視清規只因佛自在心中。
八點二十五分回到車站,感覺停靠月台的列車有點不一樣,心慌列車不是開走了嗎?但見隔離乘客,最重要林雪車長還在,稍為安心一點。多等幾分鐘,列車除除開來。其實每次下車應把行李帶落隨身以防萬一,亦其實你的行李只有相機或一大把泰銖就可,就係每站落車都會買到沙冰奶茶咖啡已教你連水樽也慳返。
九點,列車途經Nong
Pla Duk Junction,月台有一石碑寫此係泰緬鐵路起點,但列車只稍停,不能讓你落去打個卡。
再過五十分鐘,列車到是日也是泰緬鐵路之一重點,也是大衛連電影場景:桂河橋(River Kwai bridge),但列車只停二十分鐘,雖橋係由月台往前一分鐘到,但橋底還有個平台 ,由平台影完橋底時你又見對岸有座觀音廟,平台旁有免費船搭過去但似唔夠時間,趕回上橋時你發覺原本夠狹窄的單軌橋因同時間要招呼一列車另加四方而來的旅客,頓時人山人海,當你走到橋另一端旅客稍為稀少時,你見只餘五分鐘火車就開,要立馬趕回。就係不能讓你慢步感受,當然又提醒你還未睇《桂河橋》,那請回去看了再來。
十二點列車到達南多瀑布
(Nam Tok Sai Yok Noi),這次停靠達兩個半小時。這裡是現實泰緬鐵路終點,二次大戰完結後,緬甸段已全廢,泰國段亦只修復至此。九十年代有提出全段修復但沒下文,早些年緬甸仍係昂山素姬掌權,還會有泰國遊客過去,那時還真最有可能復修,只可惜後來軍政府又奪權。或要靠某国一載一露,但起出來應該係現在中老鐵路那種,唔駛旨望面前的蒸氣機車會奔馳路軌上。
南多瀑布則係個沒啥氣勢的石澗,下方水氹夠遊人嬉水,旁有階梯可步上上方大石,你或可當喺天然水上樂園,拿大石當滑梯。沒有帶泳衣遠處檔攤有賣,亦有洗手間。只係我手揸相機,亦見唔到儲物櫃。
正值午膳時間,這裡最流行的用膳方式似打地鋪野餐,都係個句膳食唔需專登帶來,作為以食為天的國度景點隔離一定一列列排檔或餐廳。見到一間門口在烤著一隻隻雞,二話不說走進去點半隻,烤雞上檯時心諗早上在佛統府食的早餐還未來得切消化,但同時也給了我藉口在這檯上呆上一個小時。
嘆完燒雞到處遊走,至兩點半火車開動回程,近三點列車再到Thamkra Sae,車廂又多了一倍乘客。大家見到桂河時又滿佈窗戶前舉起手中電話相機。我又重施故技走進廁所拍照。但拍到咁上下,車長突把我叫出來,繼而扣上門。醒起這廁所係直排的,大概怕我還真的在這車緩慢行駛之際大小二便。
唔計吃喝,120Bhat玩盡一日的列車之旅係無可挑剔,若你係鐵路迷那還會挑未能在Nong
Pla Duk Junction打卡、未行夠桂河橋、未能踏足Thamkra Sae旁桂河沿岸、未能到泰緬鐵路博物館等等。話雖每日由吞武里 (Thon buri)
兩班和北碧一班至南多對開的都能讓你唔用包車而踏遍,只係要費時間。若你金錢時間都欠,那似要學懂知足,才能成夠格的特種兵。
沒有留言:
張貼留言