五邑行 - 梁啟超故居

 

話說某場交流團最後一日，原定嘆完古井燒鵝就返香港，自己見仍有時間便離隊到附近走走，見附近就有梁啟超故居。

其實略讀過歷史都知，新會這屋只純粹係梁的出生地，真正稱上是其故居係天津的飲冰室。梁一生重要事蹟：戊戌變法、流亡海外、北洋政治生涯、晚年學術研究，唔係在海外那就在京津，梁有幾何返過這舊居，亦係一大問號。

 

見這天藍天白雲，影甚麼也漂亮，於是進這舊居拍一下這帶旋轉樓梯的歐式主樓，其實這樓係後期僭建。內裡所介紹的梁啟超，係只限於政治上，問題係梁也只順著政治洪流，其親手成就都係學術上，就係中華民族這詞正係由其開創，但連這理應某人最喜歡的題目也沒怎討論，所以也在此涼個冷氣就可。

 

主樓左側過了銅像係梁真正的舊居，及其少時讀書的怡堂書室，以今日角度看：梁小時係5A狀元，廿歲時係搞時之廢青，中年時名成卻未算利就，晚年就專注學術遠離政治漩渦。差點睇漏門外有塊梁啟超立的「司法總長參政院參政」牌，就係高中狀元做大官總要衣錦還鄉，所以民國四年也回去一次。

 

其實舊居裡除了僅餘遺下的家具外，大概一家人最緊要齊齊整整，於是再賣梁思成等子女。見炎炎夏日，按耐不住走出去食條陳皮雪條，陳皮和燒鵝都係這裡特產。你問我走了一轉能感受到愛国情懷？吾，我想我還是隻不問政治只求食完打卡的港豬就好。反正返香港途徑口岸所見那一列名單，我都見到年少梁啟超的影子。