關西行 - 你好KOBE

 

難得四日連假，心諗除了大陸台灣還有甚麼選擇？見日元持續貶值，答案呼之欲出。你問唔怕核廢水污染？我說反正美麗新香港後，就快切爾諾貝爾周邊都顯得冇咁怪異。

回想上次大阪京都五日卻都係走馬看花，今次四日又會夠？都係搭樂桃，但今次去程可選凌晨近一點起飛大清早五點多到、回程夜晚近九點飛近十二點返到之班次。原本你在官網買要付近三千，那就天空搜尋器一搜，搜到有網上旅行社標價千八，見其有香港旅遊業議會持牌，值得一博。去程在香港機場的登機櫃位沒啥問題，回程在關西機場的自助登機電腦上按極那訂單號碼都搜唔到，架仔機場職員拿我護照一對再笑說：「哦，D代理成日都亂鳩咁俾冧吧架啦。」吾，平千二只係這毛病算小意思。

 

預辦登機時職員問坐通道旁OK嗎？我心諗大半夜前窗外該冇咩風景還不如看空姐，便懶型說沒所謂。結果五點左右我就後悔了：飛機左邊窗戶見到下是雲海，上是日出之晨光，我就此描述你也想到若在現場定必拿出手機相機拍下此情此景，當然坐在我隔離那對情侶就如此猛打卡，我想拿相機攝過去似乎太有失斯文。這刻我記定了，下次坐這航班時一定要坐左邊窗口。

 

除了問空姐拿入境及海關申報表來填，現在還可上機前到Visit Japan Web填報，但操作上似乎傳統的還方便一點。出了關，「傳統」係坐接駁車到第一航廈JR或南海電鐵或利木津也好總之係落大阪，但面前有個櫃位，寫著只要你有外國護照，只需五百Yen就有另類選擇。

在國內線航廈便利店吃掉炸豬排三文治作早餐後，回到剛才買票的櫃位附近上另一架接駁巴，搭到一個碼頭，坐上三十分鐘船程，渡過遼闊的大阪灣，到另一個人工島。原本可直接在碼頭門口坐接駁車到機場，但自己卻對碼頭隔離的親水公園好奇，反正轉頭步去機場只兩三分鐘路程。公園聚著釣魚郎，面前係普通的人工島橋和遠而顯得微小的貨運碼頭，看著市井風情但沒手持咖啡，還是轉身步往機場。

原本步進神戶機場想買到張ICOCA卡就直奔市區，但在新交通車站機場便利店都買唔著，找卡買的同時目測這機場只三層，好奇上樓逛逛：二樓已有比關西第二航層似樣點的餐廳。三樓係可遙望停機坪跑道的空中花園，雖被鐵網圍著，但大清早的陽光照射下，把從便利店買著的三文治飯團帶上來躺在椅上懶洋洋地食肯定係唔錯享受，又要後悔落機太快吃早餐。 

盼望去到市區唔會再出現如在吉隆坡買唔到交通卡的怪事，在售票機買了張往三宮的票，機唔難看明，反正三宮就係終點站，買去到最遠程就成。神戶新交通其實也唔新，目測起碼行了近廿年，係如澳門輕軌的膠輪列車。大清早車站還真沒多少人，輕易坐到車頭前拍車前路軌拍到夠。我發現日本鐵路裡的關愛座係可有可冇，因為找座位坐真係唔難，雖然我搭著車都係非上下班時間。其實真碰著傳說中的通勤地獄，你要擠到過去關愛座也太難。

三宮名乎其實神戶市中心，無論你要東至甲子園、西至鐵人28像、南到美利堅、北上摩耶山，都係由這裡出發。所以酒店選附近一間就可，唔知係日元軟腳蟹還是淡季，三百港幣已可瞓到間商務酒店一晚，房間是正不特正，還要架妹前檯招呼，早上寄存行李晚上回來已幫你安放好在房裡，你突覺得在深圳瞓乜天連鎖都似在交智商稅。

只係三宮同日本其他都市市中心沒太大不同，你要搵神戶的標誌來打卡在這裡係搵唔著。一係要搭JR到新長田，找鐵人28號像來拍，鐵人28係咪真起於神戶唔知道，只想到如《大佛普拉斯》裡一座寺廟欠神明，於是把老蔣事奉起來當神，鐵人也似是這樣功能。只係在神戶人眼中它還沒有那麼神聖，這裡它腳下人頭湧湧，但人們眼光都集中在其前面台上沖繩祭，或隔離賣小食雞尾酒的攤檔。

或畢竟神戶係港口，要搵神戶的象徵要到海邊：轉搭地鐵去港元町，出站向南，望著神戶港塔方向走。要最是撚但搵城市的標誌還真係要搵塔，只係這塔下一大半在裝修。或每個城市都有摩天輪，對岸的紅色摩天輪已顯得不稀奇。中日關係正常化紀念碑及BE KOBE標誌更成為在地小孩或外地遊客的玩物。

 

回三宮時，一些明顯舊時作大銀行的大器建築陸續出現路上，幕末黑船到臨，神戶作為被迫開放之一港，由元町至三宮作為外國人居留地，神戶亦作為日本最西化地區之一。只係舊建築密集度既不如上海外灘甚至武漢也比不上，大概一係居住地制度只行到一八九九年，二係大部分古建於二戰空襲被毀，三係經濟急速起飛新建築順勢推倒舊物。

 

再由三宮一路向北，會到北野異人館區，就如廣州西關領事館區，都係兩層高雅致平房。但此區高位無論天滿神社還是附近背山散策路北野道，都只係近望兩三平房，唔係如廈門鼓浪嶼日光岩居高臨下，當然這裡又比鼓浪嶼清閒很多。

絕大部分異人館都要收入場費，有些誇張到在館門前想舉機拍照時，明明在庭園掃地的小妹職員會主動上前介紹景點，其實時間充裕一看無妨只係我真沒太多時間。萊茵館係絕少數無料入場，卻竟沒人注意到，內裡還唔算失禮。心想若再有下次，還可如遊台南般來個異人建築考究之旅。

離開前你問我是否看漏神戶的夜晚，其實相對大阪，這裡夜間還真沒啥特別。就係吃完神戶牛晚餐還想吃點宵夜，夜九半走到中華街時竟所有餐館皆已落閘。抱怨又只能光顧便利店時又反省日入而息唔才是正常？香港搞咩夜繽紛爺孫劈酒，或都受盡外人怪異目光。看來在美麗新香港下，仍有自由出國的權利尤其重要，就係來一次日本，我反覺得腦袋比在香港正常一點。